مقارنه بسيطه بين (الطفل الفافي) . . و(الطفل البيئه )

(*الطفل الفافي)و (الهاى لايف)

الولد من دول يصحى على صوت الكناري اللي في اوضته .... - سو سو سو سو ..

يدخل الحمام ياخد شاور .... ويغسل شعره بشامبو من ايطاليا .... ويحط جيل بالمرز من فرنسا ويغسل سنانه بمعجون سنسوداين .....

يطلع من الحمام يلاقي الداده مستنياه بفوطه من حريييييير .... وتلاعبه وتهزر معاه بالانجليزي .... - الداده معاها دكتوراه من جامعة اسفخص في لندن -

يخش على اوضته ... ويفتح الدولاب ويطلع منه هدومه المكويه واللي ريحة برسيل باينه فيها ..... - برسيل .... نسيم الصباح -

يجيب جزمته من الجزامه ... اللي مليانه جزم وكوتشيهات ... وسبوووز ..... - تقولش دخلت محل لطفي أو توكيل تمبرلاند -

ينزل يفطر مع مامي ودادي ... والفطار كورن فليكس بطعم الستروبوري او الشوكولات وأحيانا أومليت وشويه مربه والله مش عارف أنطق الباقى بس فى كورن فليكس .... -
كورن فيليكس كلووقز . . إبن عم الفول والطعميه لزم .....

يسلم على مامي ويبوسها بعد ماتكون حطتله ديناربوكس بتاعه وفيه .... ساندوتشين تشي****ر و كيس شيبسي و عصير جهينه او ايزي موزوو - ايزي مووزو !!!! فاكرين الاعلان ده ؟؟؟ -

يسلم على دادي اللي يديله البوكيت موني بالدولار ..... مش يعرفو حاجه اسمها جنيه طبعا - جنيه ؟؟؟؟ دي عملة انكردت من زمااان -

يطلع من البيت بعد الداده ماتلبسه الشنطه بتاعة الكتب على ضهره .. - شنطه مش حامله طائرات

يركب الباس بتاع السكول .... ويشاور (باي باي) للداده ولمامي ... ويركب مع زمايله ويغنو بالانجليش او الفرينش ..... - فريدرو جاكو .... فريدرو جاكو ... العيال دى ما بيشتموش بعض تقريبا ولا إيه -

*الطفل البييييئه

دييييييييب .... اخوه رمى عليه طوبه عشان بقاله ساعتين بيصحي فيه ... وهو ولا هنا ... - طبعا .. مقضيها صرمحه في الشارع للفجر -

يصحى من النوم تشوف وشه تقولش مصفه - ما طبعا ما كل يوم يتخانق له خناقه لازم ياخد بشله فى وشه - أسمها علامه الصياعه

المهم ما يعرفش حاجة أسمها غسيل وش يدوبك هى الخناقه بتاعه كل يوم مع اخواته ويكون فاق وعال العال وعمل الدماغ كمان -

طبعا بعد الخناق ده بيبقى جعان ... تلاقيه بيحوم في الشقه ويدوّر في المطبخ على اي حاجه .... انشالله صرصار .. برضه هاياكله من الجوع - عشان كده ماتلاقيش في بيتهم صراصير احسن من مبيد حشرى طبعا -

بعد ما يحط في بطنه اي حاجه في رغيف ... يدور على اي حاجه يلبسها .... القميص مرمي تحت السرير ... ويقلع اخوه الصغير البنطلون بتاعه وهو نايم ... - لسه ما وصللهمش إختراع المكوه

طب وبعدين .... ساعتين بيدور على الجزمه ... مش عارف رزعها فين ... واخوه الكبير خارج من البيت حافي كمان عشان مايقولش انه خدها ... افتكر اخيرا انه حاطط فرده منهم فوق الدولاب .... والتانيه ... تحت التلاجه !!!!!! - طبعا مفيش شراب أصل الجزمه مخرمه من كل ناحيه فلو فيها شراب هيبان ويبقا منظرها مش حلو - نظريه بردة
........

دلوقتي معاد حرب كل يوم .. : ماما ... انا عايز مصروفي : مصروف ايه ياااااض ... انت مش واخد امبارح .. ولا كل يوم مصروف مصروف : إيه يعنى مفيش مصروف ؟؟؟ : في دي
...دييييب ... -رزعته بالحله على نافوخه - الباشمهندس الصغير .... مايعرفش فين كتبه ولا كشاكيله اصلا .... عشان كده ... خد اي كتاب موجود في البيت على اي كشكول
.... -مايعرفش يعني ايه قلم .... غير اللي بياخده على قفاااه -

هايروح مدرسته ازاي ؟؟؟ طبعا اي ميكروباز او عربيه نقل وقضيها شعبطه .... - ليااااااااااااااااااااااااااااقة - وطول ما هو ماشى مش ساكت لايشوط الطوب برجله لا يعاكس واحدة ماشيه لا يأكل اللى قدامه على قفاه ويجرى عفريييييييت

في طابور المدرسه


*الطفل الفافي (الهاف لايف)

العيال كلهم واقفين في صفوف شكلها يفرح .. ده غير ريحتهم اللي زي الفلشكلهم كلهم بيغسلوا ببرسيل نسيم الصباح

الطابور كله تمارين ونشاط .... - على انغام الدي جي (ياسر الحريرى -

الاذاعه المدرسيه ... اخبار من مجلات (واشنطون بوست - تايمز - وطبعا .... من غير ترجمه

يغنو النشيد الوطني بقيادة المايسترو (سليم سحاب) - (حسن كامي) ... كان بيغنيه معاهم قبل ما ربنا يفتح عليه -

طالعين فصولهم وكأنهم ملايكه أو فراشات ... وبحماس ونظاااام - تقريبا ... والله أعلم ... بيحبو مدرستهم .... سبحان الله

*الطفل البيئه

داخل المدرسه متأخر وحالته نيله - اتشعبط في مكروباز (شبرا) ... ومدرسته اصلا في الحلمية

بعد التذنيب والشتيمه من مدرس الألعاب (حسن عضمه ) ... انضم لباقي زمايله في المعتقل ... سوري ... زمايله في المدرسه - ولا واحد منهم فاهم هو فين أصلا ... واتضح ان صاحبنا أشيييك واحد فيهم - تخيلو إنتو بقا المنظر

بتبدأ الإذاعه المدرسيه -

النشيد الوطني اللي هم بيقولوه .... بتاع دوله مجهوله ... ونفسي اعرف ايه هي؟؟؟ والله بيغنو للفول والطعميه فى الطابور وماحدش واخد باله

- طبعا كل دة على موسيقا آلات النفخ .... الشيشه -

في مرحلة طلوعهم الفصول .... بيختلط الحابل بالنابل .... - ياترى انا في فصل ايه النهارده ؟؟؟ -

بعد المدرسه ما تخلص ... بيرجعو على بيوتهم بنفس الاسلوب .ونشوف يومهم عامل ازاي دلوقتي

*الطفل الفافي

يرجع من السكول تكون الداده في استقباله ... وتشيل منه الشنطه ... ويغسل وشه ويغير هدومه - والله العظيم ... وشه انضف من ما كان طالع الصبح أصلا -

بعد ما اتشطف .... وإتصبّن - يقعد يلعب بلاي ستيشن2 -1 دة قدم أوى - لحاد ما يعملو الغدا - الغدا بتاعهم حاجات غريبه بشوفها ديما فى الروشته بتاعه الدكتور -


هاني ... دينر از ريدي السيين اللى بينهم لما بيخلص تحضير الغدا -

بعد الغدا ... يشرب كبايه (اورانج جووس) وينام ساعه عشان يعرف يذاكر ويحل الهوم وورك - مش عارف يعني ايه هوم وورك الهوم ورك كنت فاكرها حبوب بس أختى الصغيرة صححت لى المعلومه

*الطفل البييئه :

أخينا رجع من المعتقل ... او المدرسه زي مابيقولو عليها ... وهدومه كلها مقطعه وعلامات التعذيب على جسمه ... - تقولوش جاسوس اسرائيلي اتمسك في حلوان -

امه لسه ماخلصتش الغدا ... - النهارده امه دابحه دكر جبنه بيضه ... واحتمال يكون في فول بالصلصه -

ترااااادااترااااااااااااااااااااااااا ... - دي اعلان الحرب ... أو الغداهجووووووووووم


بعد اكلة الفول بالصلصه ومعاه فحلين بصل ... عادة ما يعقبها احساس بالضياع - تنااااااااحه ... فور آيفير -

بعد حالة التناحه او النوم دي ... بيجي وقت الشده ... ياترى الحياه معاهم - الطفل الفافي .. والطفل البييئه - عامله
ازاي ؟؟؟؟

*الطفل الفافي (الهاف لايف)

يقوم من النوم على صوت الداده ... الهادي طبعا .. عشان يقوم يذاكر مع المس (فرانكا) ... المدرّسه اللي جايبنهاله من انجلترا - نازله مخصوص ....... بالكاتالوج -

بعد ما يخلص المذاكره وتحضير دروس تاني يوم .... مامته تاخده النادي عشان يلعب رياضه (باسكت او تنس) و احتمال (سكواش) - مشتركين في نادي المعادي والصيد والشمس ده غير سبورتنج في الصيف -

يرجع من النادي ... ياخد دش ويحضر شنطته وينزل يتفرج على شانل تو - شانل تو بتاعة الام بي سي ... مش بتاعة مصر طبعا -

على الساعه 10 يقوم عشان ينام .... والداده تحكيله حكايه قبل النوم - سندريللا وسنوو وايت .... بس طبعا مش زى أبو رجل مسلوخه وأمنا الغوله !

ينام على صوت الداده وهي بتغنيله اغنيه رومانسيه ... وفي حضنه الدبدوب اللي جاله في عيد ميلاده - ملاك نايم يا اخواتي

*الطفل البيييئه

يفوق من حالة التناحه من الفول والبصل على صوت حد من صحابه ... عشان ينزل يلعب كوره شراب في الخرابه اللي جنب الحاره بتاعتهم

يرجع بيتهم وهو بيجري وهدومه متقطعه ودماغه واخده بتاع تلاتين قلم على سهوه .... عشان شاط الكوره وكسر القزاز بتاع محل (عم سيد) البقال - الراجل ده من كتر القزاز بتاعه ما اتكسر ... هايفتح مصنع قزاز -

اخته جابته عشان يحل الواجب ويذاكر .. بس مامعاهوش قلم ... قام نزل الشارع عشان يجيب قلم - آدي دقني لو جاب ولا حتى رجع من أصله -

على الساعه 2 الفجر ... باب بيتهم بيخبط .. وامه فتحت الباب شافت جارهم دماغه متعوره وجايب لها المحروس اللي كان بيلعب حرب بالطوب وفتح دماغه - تقولش طفل من أطفال الانتفاضه -

ساب امه وابوه وهم بيصالحو جارهم وبيبوسو ايده عشان ما يعملوش محضر .... واتسحّب المفعوص على المطبخ جاب حتة جبنه وطماطمايه ورغيف معطن .... وزوغان على السرير - بسلامته نايم وهو متلفح بالبطانيه زي مايكون من مطاريد الجبل بيحلم هيضرب مين بكرة وهيبطح مين والواد سيد راهنه أنه ياكل الواد مسعد على قفاه بكرة يتشعبط و يتخانق والأبله اللى فى الفصل و والبت سعاد و و و و خخخخخخخخخخ وينام المفعوص على عينه